Kennitala sjóðsins er 620515-0860 

Reikningur sjóðsins er 0133-18-460003

Minningar - og áheitasjóður Indriða Einarssonar

Minningar - og áheitasjóður var stofnaður til minningar um um Indriða Einarsson leikmann Fylkis.

Indriði fæddist í Reykjavík 30. janúar árið 1971 og bjó frá tveggja ára aldri í Skipasundinu. Indriði hóf feril sinn hjá Þrótti í Reykjavík þar sem hann æfði og spilaði handknattleik og knattspyrnu með yngri flokkum félagsins alveg upp í 2. flokk. Þá stóð svo á hjá Þrótti að ekki var nægur mannskapur hjá félaginu til að halda úti 2. flokki í knattspyrnu. Hann skipti því því yfir í Fylki þar sem hann varð meðal annars bikarmeistari með 2. flokki árið 1989. Indriði var mjög efnilegur knattspyrnumaður og ekki annað séð en framtíðin væri björt.  Hann spilaði með meistaraflokki Fylkis í þrjú ár og átt stóran þátt í því að Fylkir tryggði sér sæti í efstu deild í september 1992. Seinna um haustið lá leið hans til Möltu þar sem hann fór til reynslu hjá Hibernian og í framhaldinu buðu þeir honum samning. Á þessum tíma var Indriði einnig í 21 árs landsliði Íslands og hafði þegar spilað einn leik á móti Frakklandi. Eftir að hafa spilað á Möltu ásamt æskuvini sínum Ingvari Ólasyni í um tvo mánuði, varð Indriði bráðkvaddur á Möltu laugardaginn 21. nóvember 1992. Andlát Indriða var öllum Fylkismönnum harmdauði.
Í minningu Indriða arfleiddi móðir hans bæði Þrótt og Fylki að peningaupphæð sem verja skyldi til styrktar efnilegum krökkum frá efnaminni heimilum.  Í samræmi við þá ósk er tilgangur Minningar- og áheitasjóðs Indriða Einarssonar að......"styðja og styrkja börn og unglinga sem æfa knattspyrnu með yngri flokkum Knattspyrnudeild Íþróttafélagsins Fylkis. Megináhersla er á stuðning við börn og unglinga sem geri þeim fjárhagslega kleift að leggja stund á íþróttina..."

Iðkendur er t.d. styrktir með þátttöku í greiðslu æfingagjalda, gjalda vegna æfingaferða eða þátttöku í mótum, búnaðar til iðkunar eða annars sem tengist starfinu.
Úthlutað er úr sjóðnum eftir aðstæðum. Beiðnir um styrki eða ábendingar skulu sendar á netfangið hordur@fylkir.is      

Hægt er að kaupa minningarkort og rennur ágóðinn óskiptur í sjóðinn. Minningarkort er hægt að kaupa á heimasíðu Fylkis (sjá ofar) og með því að hafa samband við skrifstofu Fylkis s. 571-5601.

Sjóðurinn fjármagnar einnig starfsemi sína með frjálsum framlögum, s.s. gjöfum, styrkjum og áheitum. Fylkismenn eru hvattir til að efla sjóðinn með frjálsum framlögum og sýna með þeim hætti að samstaða og samhjálp er órjúfanlegur hluti af Fylkishjartanu og þess að vera Fylkismaður.  

Stjórn sjóðsins skipa á hverjum tíma fimm einstaklingar sem skipaðir eru af stjórn knattspyrnudeildar Fylkis. Núverandi stjórn skipa:

Finnur Kolbeinsson
Kristinn Tómasson
Loftur Ólafsson
Steinunn Jónsdóttir
Þór Hauksson

Megi minning um góðan dreng lifa í félaginu um ókomin ár.